ഹൃദയത്തില്‍ നിന്നുള്ള ഒരു പ്രണയലേഖനം

-പണ്ടൊരിക്കല്‍ എസ്.എം.എസില്‍ തുടങ്ങി കൊഴിഞ്ഞുപോയ പ്രണയത്തില്‍ ഇന്നീ കത്തിന് വലിയ വിലയൊന്നും കാണില്ല എന്നറിയാം. എങ്കിലും മനസ് എഴുതാന്‍ പ്രലോഭിപ്പിച്ചതുകൊണ്ടും, ഒരിക്കല്‍ എനിക്ക് എന്‍റെതാണെന്ന് തോന്നിയ മുഖം, വര്‍ഷങ്ങള്‍ കൊണ്ട് എന്‍റെ ഹൃദയത്തില്‍ ജനിച്ച് ഇന്നും ജീവിക്കുന്ന മുഖം ഒരിക്കല്‍ മറ്റാരെയോ തേടി മായ്ഞ്ഞുപോയപ്പോള്‍ ഹൃദയത്തില്‍ കൊത്തിവച്ച രൂപം മായ്ക്കാന്‍ പറ്റാത്തത് കൊണ്ടും മാത്രം എഴുതുന്നു.-

-സ്നേഹിച്ചു ചതിക്കുന്ന മുഖങ്ങള്‍ക്ക് പൊതുവേ പറയാനുള്ള കഥകള്‍ക്കപ്പുറം നിനക്കേറെയിന്നു പറയാനുണ്ടെന്നു എനിക്കറിയാം. ഒരിക്കല്‍ ജീവനുതുല്യം സ്നേഹിക്കുന്നതായി അഭിനയിച്ചു എന്നില്‍ നിന്ന് പറിച്ചെടുത്തു നീ മറ്റാര്‍ക്കോ കൊടുത്ത പ്രണയം നിന്നെയിന്ന് ഒറ്റക്കാക്കിയെങ്കില്‍ അതില്‍ നിന്നെ കൊണ്ടെത്തിച്ചത് മരിക്കാത്ത ഓര്‍മ്മകളെ തേടിയലയുന്ന എന്നെ പലപ്പോഴും പലതില്‍ നിന്നും തടഞ്ഞിട്ടുള്ള വിധിയെന്ന നിഴല്‍ രൂപമാണ്.-

-ഇന്ന് നീയും എന്നെപ്പോലെ തനിച്ചാണ്, കാലം നിന്‍റെ മനസ്സില്‍ ബാക്കിവച്ച ഓര്‍മ്മകളില്‍ ഞാനില്ലെങ്കിലും, എന്നെ വേട്ടയാടുന്ന ആ മുഖം നീയായതുകൊണ്ടും എന്‍റെ പ്രണയം സത്യമായിരുന്നതുകൊണ്ടും എന്‍റെ കയ്യെത്താ ദൂരത്തുള്ള നിന്നെ ഞാനെന്‍റെ ജീവിതത്തിലേക്ക് കൈകള്‍ നീട്ടി ഒന്നുകൂടി തിരിച്ചു വിളിക്കുന്നു. അന്ധത നിന്നെ വിട്ടു പോയിട്ടുണ്ടെങ്കില്‍ നിനക്ക് വരാം ചതിയെന്തെന്നു അറിയാത്ത ലോകത്തിലേക്ക്‌.-

(ഒരു സുഹൃത്തിന്‍റെ ജീവിതത്തില്‍ നിന്ന് കടമെടുത്ത് എഴുതിയത് )